වාර්තාගත අයුරින් සංචාරකයින් පැමිණියද, 2025 ඔක්තෝබර් මාසයේ සංචාරක ව්‍යාපාරයෙන් ලැබුණු ආදායම අපේක්ෂාවන්ට වඩා බෙහෙවින් අඩු වී ඇති බව නවතම දත්ත වාර්තා පෙන්වා දෙයි.

ශ්‍රී ලංකා මහ බැංකුවේ (CBSL) නවතම දත්ත අනුව, ඔක්තෝබර් මාසයේ සංචාරක ආදායම ඇමරිකානු ඩොලර් මිලියන 186.1ක් වූ අතර එය වාර්ෂිකව 0.3% ක සුළු වැඩිවීමක් පමණයි.

2018 ඔක්තෝබර් මාසයේදී සංචාරක කර්මාන්තයෙන් අමෙරිකානු ඩොලර් මිලියන 287.4 ක් උපයා ඇති අතර මෙම වසරේ ඔක්තෝබර් මාසයේදී උපයා ඇත්තේ ඇමරිකානු ඩොලර් මිලියන 186.1ක් පමණයි.

එය 2018 ට වඩා ඇමරිකානු ඩොලර් මිලියන 101.3ක පසුබෑමක්.

මේ වසරේ ඔක්තෝබර් මාසයේදී මෙරටට සංචාරකයින් 165,193 ක් පැමිණ ඇති අතර, එය 2018 ඔක්තෝබර් මාසයේ පැමිණි 153,123 ක වාර්තාව අභිබවා යමින්, මාසයක් තුළ මෙරටට පැමිණි ඉහළම සංචාරක සංඛ්‍යාව සටහන් කරනු ලබයි.

කර්මාන්ත විශ්ලේෂකයින් පෙන්වා දෙන්නේ, දිනකට සංචාරකයින්ගේ සාමාන්‍ය වියදම ඇමරිකානු ඩොලර් 171 ක් පමණ වන අතර, එය අපේක්ෂාවන්ට වඩා සැලකිය යුතු ලෙස අඩු බැවින් සමස්ත ආදායම් වර්ධනයට බාධා ඇති කරන බවයි.

2025 වසරේ මුල් මාස 10 සඳහා සංචාරක අංශය ඇමරිකානු ඩොලර් බිලියන 2.65 කට වැඩි ආදායමක් උපයා තිබේ.

මෙය 2018 වසරේ එම කාලය තුළ උපයාගත් ඇමරිකානු ඩොලර් බිලියන 3.53ට වඩා 33% ක පසුබෑමක්.

රජයේ අතිමහත් අභිලාෂකාමී වසර අවසාන ඉලක්ක වන ඩොලර් බිලියන 5ක ආදායම සහ සංචාරකයින් මිලියන 2.6ක් කරා ළඟා වීමට, ඉදිරි නොවැම්බර් සහ දෙසැම්බර් මාස දෙක තුළදී ඇමරිකානු ඩොලර් බිලියන 2.34කට වැඩි මුදලක් (මාසිකව ඩොලර් බිලියනයකට වඩා වැඩි) උපයා ගැනීමට සිදුවන අතර මෙය වර්තමාන මාසික කාර්ය සාධනය මෙන් හතර ගුණයක් පමණ වේ.

විශ්ලේෂකයින් අනතුරු අඟවන්නේ, පවතින ඉල්ලුමේ වේගය අනුව මෙම ඉලක්කය සපුරා ගැනීම “අසීරු” බවයි.