හමාස් සමඟ සටන් විරාමය ආරම්භ වූ දා සිට ගාසා තීරයේ ගොඩනැගිලි 1,500කට වඩා ඊශ්‍රායලය විසින් විනාශ කර ඇති බව BBC Verify විසින් සමාලෝචනය කරන ලද චන්ද්‍රිකා ඡායාරූප මගින් හෙළි වී තිබේ.

දෙපාර්ශ්වය විසින් සටන් විරාමය ආරම්භ කරන ලද්දේ ගෙවුණු ඔක්තෝබර් 10 වැනිදා සිටයි.

නොවැම්බර් 8 වන දින ගත් නවතම ඡායාරූප ඇතුළු මෙම ඡායාරූප පෙන්නුම් කරන්නේ ඊශ්‍රායල ආරක්ෂක හමුදා (IDF) විසින් පාලනය කරන ලද ගාසාහි සමස්ත ප්‍රදේශ මාසයකට අඩු කාලයකදී කඩා බිඳ දැමීම් හරහා සමතලා කර ඇති බවයි.

විනාශ වූ ගොඩනැගිලිවල සැබෑ සංඛ්‍යාව ඊට වඩා සැලකිය යුතු ලෙස වැඩි විය හැකි බවට ඉඩ ඇති බව ද එම වාර්තා සඳහන් කරයි.

මන්ද ඇතැම් ප්‍රදේශ සඳහා චන්ද්‍රිකා ඡායාරූප BBC Verify හි තක්සේරුවට ලබා ගත නොහැකි වී ඇති බැවින්.

ගාසා තීරයේ ඊශ්‍රායල හමුදාව විසින් ගොඩනැගිලි විනාශ කිරීම අති විශාල පරිමාණයෙන් අඛණ්ඩව සිදුවෙමින් පවතින බව BBC Verify හි දෘශ්‍ය විශ්ලේෂණයෙන් සොයාගෙන තිබේ.

මෙම විශ්ලේෂණය සඳහා, සටන් විරාමයට පෙර සහ පසු ලබාගත් රේඩාර් ඡායාරූප විශ්ලේෂණය කිරීම සඳහා වෙනස්කම් හඳුනාගැනීමේ ඇල්ගොරිතමයක් භාවිතා කර තිබුණේය.

පසුව විනාශ වූ ගොඩනැගිලි එකින් එක ගණන් කර තිබේ.

ඇතැම් විශේෂඥයින් තර්ක කර ඇත්තේ මෙම කඩා දැමීම් අමෙරිකාව, ඊජිප්තුව, කටාර් සහ තුර්කිය විසින් මැදිහත් වූ සටන් විරාමයේ කොන්දේසි උල්ලංඝනය කර ඇති බවයි.

සටන් විරාමය සඳහා පදනම වූ ජනාධිපති ඩොනල්ඩ් ට්‍රම්ප්ගේ කරුණු 20 කින් යුත් සාම සැලැස්මේ ගුවන් සහ කාලතුවක්කු බෝම්බ හෙලීම ඇතුළු සියලුම හමුදා මෙහෙයුම් අත්හිටුවනු ඇත යනුවෙන් පැහැදිලිව සඳහන් වී තිබුණේය.

ජනාධිපති ට්‍රම්ප් ද නැවත නැවතත් පවසා ඇත්තේ යුද්ධය අවසන් බවයි.

කෙසේ වෙතත්, ඊශ්‍රායල හමුදා ප්‍රකාශකයෙකු BBC Verify වෙත ප්‍රකාශ කර ඇත්තේ, මෙම විනාශයන් සටන් විරාම රාමුවට අනුකූලව සිදු කරන බවයි.

මෙම විනාශය සිදුවී ඇත්තේ ඊශ්‍රායලය සිය හමුදා ඉවත් කර ගැනීමට එකඟ වූ සීමාව වන කහ තීරය පිටුපස ඇති ගොඩනැගිලි ආශ්‍රිතවයි.

විනාශයට ලක් වූ ස්ථාන අතර නැගෙනහිර ඛාන් යූනිස්, අබාසන් අල්-කබිරා අවට ප්‍රදේශ, ගාසා නගරයේ නැගෙනහිර ශේජායියා අසල්වැසි ප්‍රදේශය, ජබාලියා කඳවුරේ මායිමේ පිහිටි ඉන්දුනීසියානු රෝහල ආසන්න ප්‍රදේශ ද වෙයි.

නැඟෙනහිර ඛාන් යූනිස් වැනි ප්‍රදේශවල කඩා දැමූ ගොඩනැගිලි බොහොමයක් විනාශ කිරීමට පෙර හානි වී ඇති බවක් නොපෙන්වූ බව මූලාශ්‍ර පෙන්වා දෙන බව සඳහන්.

චන්ද්‍රිකා ඡායාරූපවලට අනුව, මෙම ගොඩනැගිලිවලට ව්‍යුහාත්මක හානියක් හෝ ආසන්නයේ සුන්බුන් වැනි සලකුණු නොතිබූ අතර, ඒවායේ උද්‍යාන, ගස් සහ කුඩා පළතුරු වතු පවා තිබුණේය.

යුද්ධය ආරම්භයේදී (ඔක්තෝබර් 2023) ලබාගත් ඡායාරූප සහ සටන් විරාමය ආසන්නයේ ලබාගත් ඡායාරූප සංසන්දනය කිරීමේදී බොහෝ ගොඩනැගිලිවල සුළු වෙනසක් පෙන්නුම් කර තිබෙන බවයි එම වාර්තාවේ දැක්වෙන්නේ.