ශ්‍රී ලංකාවේ ලියාපදිංචි නොකළ මෝටර් රථ මිල ගණන් රුපියල් ලක්ෂ 5 ත් 15 ත් අතර අගයකින් මේ වන විට පහත වැටී ඇති බව ලංකා වාහන ආනයනකරුවන්ගේ සංගමයේ සභාපති ඉන්දික සම්පත් මෙරෙන්චිගේ මහතා පවසනවා.

ඊට සමගාමීව, ලියාපදිංචි කරන ලද (පාවිච්චි කළ) වාහනවල මිල ගණන්ද සැලකිය යුතු මට්ටමකින් අඩු වෙමින් පවතින බවයි ඔහු සඳහන් කළේ.

මෙතෙක් පැවති අධික ඉල්ලුම හේතුවෙන් පාවිච්චි කළ වාහන, ඒවායේ නියමිත වටිනාකමට වඩා ඉහළ මිලකට අලෙවි වූ බවත්, ඉදිරියේදී එම මිල තවදුරටත් පහත යනු ඇති බවත් මෙරෙන්චිගේ මහතා පෙන්වා දුන්නා.

වසර පහක කාලයකට පසුව, පසුගිය පෙබරවාරි මස පළමුවැනිදා සිට වාහන ආනයන සීමා ලිහිල් කිරීමත් සමඟ ශ්‍රී ලංකාවට විශාල වාහන ප්‍රමාණයක් ගෙන්වීම ආරම්භ වුණා.

වසර පහක කාලයක් පුරා පැවති ඉහළ ඉල්ලුම නිසා, එලෙස ගෙන්වූ වාහන ප්‍රදර්ශනාගාර වෙත ළඟා වීමටත් පෙර අලෙවි වූ බව මෙරෙන්චිගේ මහතා පැවසුවා.

කෙසේ වෙතත්, මේ වන විට ලියාපදිංචි නොකළ (අලුත්) වාහන සඳහා වන ඉල්ලුම අඩු වී තිබෙන අතර ඊට එක් හේතුවක් වී ඇත්තේ, තම පැරණි වාහනය මාරු කර අලුත් වාහනයක් මිලදී ගැනීමට සිටි පුද්ගලයන් එම තීරණය කල් දැමීම බවද ඔහු සඳහන් කළා.

වාහන වෙළෙඳාම සඳහා විධිමත් නොවන ලෙස බොහෝ දෙනෙකු යොමු වීම හේතුවෙන් මෙරට අවශ්‍යතාවයට වඩා වැඩි වාහන සංඛ්‍යාවක් ආනයනය කර ඇති බවද සභාපතිවරයා අනාවරණය කළා.

මෙම තත්ත්වය ක්ෂේත්‍රයේ ස්ථිර ව්‍යාපාරිකයන්ට ගැටලුවක් වී තිබෙන අතර ආනයනය කරන ලද නව වාහනයක් දින 90ක් ඇතුළත අලෙවි කිරීමට නොහැකි වුවහොත්, එහි සම්පූර්ණ වටිනාකමින් සියයට 3ක දඩ මුදලක් ගෙවීමට සිදුවන බවට වූ රජයේ තීරණයද බලපා තිබෙනවා.

මේ හේතුවෙන් ඇතැම් ව්‍යාපාරිකයන්ට තමන් ගෙන්වූ වාහන පාඩු ලබමින් අලෙවි කිරීමට සිදුවී ඇති බවද ඉන්දික සම්පත් මෙරෙන්චිගේ මහතා වැඩිදුරටත් පැවසුවා.

ශ්‍රී ලංකාවේ වෙළෙඳපොළ තුළ වැඩියෙන්ම අලෙවි වන වාහන සන්නාමය ටොයොටා බවත්, ඒ අතරින් ‘රේස්’ (Raize) සහ ‘යාරිස්’ (Yaris) මාදිලි සඳහා ඉහළ ඉල්ලුමක් පවතින බවත් ඔහු පවසුවා.

සුසුකි ‘වැගන් ආර්’ මෝටර් රථයේ ජනප්‍රියතාව අඩු වෙමින් පවතින අතර, ‘නිසාන් ලුකස්’ (Nissan Lucas) මෝටර් රථයේ ජනප්‍රියතාව ශීඝ්‍රයෙන් ඉහළ යමින් පවතින බවද මෙරෙන්චිගේ මහතා පෙන්වා දුන්නා.

සුඛෝපභෝගී වාහන කාණ්ඩය යටතේ ‘ප්‍රාඩෝ’ (Prado) සහ ‘එල්.සී 300’ (LC 300) මාදිලි ජනප්‍රිය වී ඇති බවද ඔහු ප්‍රකාශ කළා.

ශ්‍රී ලංකා මහ බැංකු දත්ත වාර්තාවලට අනුව, මෙම වසරේ පළමු මාස 8 තුළ මෙරට වාහන ආනයනය සඳහා දැරූ වියදම ඇමරිකානු ඩොලර් මිලියන 918ක්.

ඉන් වැඩිම ආනයන වියදමක් අගෝස්තු මාසයේදී වාර්තා වී තිබෙනවා.

තවද, ශ්‍රී ලංකා රේගු දත්ත පෙන්වා දෙන්නේ වසරේ පළමු මාස 9 තුළ ඩොලර් මිලියන 911ක් වටිනා වාහන 154,537ක් නිදහස් කර ඇති බවයි.

එම සංඛ්‍යාවට යතුරුපැදි 98,923ක් සහ මෝටර් රථ 40,323ක් ඇතුළත් වන බව සඳහන් වනවා.