ඉක්වදෝර ජනාධිපති ඩැනියෙල් නොබෝවා ගමන් ගත් මෝටර් රථයට ඊයේ කිසියම් පිරිසක් විසින් ගල් ප්රහාරයක් එල්ල කර ඇති අතර සිද්ධිය සම්බන්ධයෙන් සැකකරුවන් 05දෙනකු අත්අඩංගුවට ගෙන තිබෙනවා.
විදෙස් වාර්තා පවසන්නේ ඉන් ජනාධිපතිවරයාට හානි සිදුවී නොමැති බවයි.
ප්රහාරයෙන් ජනාධිපතිවරයාගේ රථයේ උණ්ඩ හානි සලකුණු දක්නට ලැබුණු බව එහි දැක්වෙනවා.
එරට රජයේ ඉහළ පෙළේ අමාත්යවරයෙක් මෙය ඝාතන තැතක් ලෙස හඳුන්වා තිබුණා.
විරෝධතාව අතරතුර ජනාධිපතිගේ මෝටර් රථයට උණ්ඩයක් එල්ල වූවාද යන්න සැක පළකෙරෙනවා.
පරිසර හා බලශක්ති අමාත්ය ඉනෙස් මන්සානෝ, ජනාධිපතිවරයා ඝාතනය කිරීමට තැත් කිරීමක් පිළිබඳව අධිකරණය හමුවේ පෙත්සමක් ද ගොනු කළා.
ඇය පැවසුවේ, විරෝධතාකරුවන් 500ක් පමණ විසින් නොබෝවාගේ රථපෙළ වට කර ගල් ප්රහාර එල්ල කර ඇති බවයි.
අත්අඩංගුවට ගත් අය ත්රස්තවාදය සහ ඝාතන තැතක් යටතේ නඩු කටයුතු සඳහා යොමු කරන බව ජනාධිපති කාර්යාලය ප්රකාශ කළා.
ප්රහාරය පිළිබඳව අදහස් දැක්වූ අමාත්ය මන්සානෝ, “ජනාධිපතිගේ මෝටර් රථයට වෙඩි තැබීම, ගල් ගැසීම, රාජ්ය දේපළවලට හානි කිරීම අපරාධයක්. අපි මේවාට ඉඩ දෙන්නේ නැහැ” යැයි පැවසුවා.
ප්රහාරය සිදු වූ ස්ථානයේ සිට කිලෝමීටර් 77ක් (සැතපුම් 48ක්) දකුණින් වූ ක්වෙන්සාහි පැවති ශිෂ්ය හමුවකදී ජනාධිපති නොබෝවා සඳහන් කළේ, ඔහුගේ රජය මෙවැනි ක්රියා ඉවසන්නේ නැති බවයි. “අපිට මේ උත්සවයට සහභාගි වීම වළක්වන්නට උත්සාහ කළ, අපට පහර දීමට උත්සාහ කළ අයගේ නරක ආදර්ශය අනුගමනය කරන්න එපා. නව ඉක්වදෝරයේ මෙවැනි ප්රහාර පිළිගන්නේ නැති අතර නීතිය සියලු දෙනාටම අදාළයි” යනුවෙන් ඔහු පැවසුවා.
විරෝධතාව පැන නැගී තිබුණේ ජනාධිපතිවරයා විසින් පසුගිය මාසයේ ඉන්ධන සහනාධාර ඉවත් කිරීමට එරෙහිවයි.
ජනාධිපතිවරයා සැප්තැම්බර් මැද භාගයේදී සහනාධාර ඉවත් කරන විධායක නියෝගයට අත්සන් තැබූ අතර, ඔහුගේ රජය සාමය පවත්වා ගැනීම සඳහා පළාත් කිහිපයක හදිසි පියවර ප්රකාශයට පත් කළා.
රජය සහනාධාර අවසන් කිරීම ආරක්ෂා කරන අතර, එය වසරකට ඩොලර් බිලියන 1.1ක් නිදහස් කරනවා.
කුඩා පරිමාණ ගොවීන්ට සහ ප්රවාහන අංශයේ සේවය කරන පුද්ගලයන්ට වන්දි ගෙවීම් ලෙස දැනටමත් එම මුදල් යළි බෙදා හැරීමට පටන් ගෙන තිබෙනවා.
ජාතික ස්වදේශික සම්මේලනය, ඩීසල් සහනාධාර අවසන් කිරීමට එරෙහිව දින 16කට පෙර වැඩ වර්ජන ක්රියාමාර්ග, පෙළපාලි සංවිධානය කිරීම සහ සමහර මාර්ග අවහිර කිරීම් දියත් කළා.
විවේචකයින් පවසන්නේ මෙම පියවර ජීවන වියදම ඉහළ නංවනු ඇති බවත්, එය විශේෂයෙන්ම කුඩා පරිමාණ ගොවීන්ට සහ ස්වදේශික ප්රජාවන්ට බලපානු ඇති බවත්ය.
මෙම ප්රහාරය කොස්ටරිකා, හොන්ඩුරාස් සහ පැනමාව ඇතුළු විදේශීය ආණ්ඩු කිහිපයකින් ද හෙළා දැක තිබුණා.
