අබුඩාබි එමීර් රාජ්යයේ අධ්යාපන බලධාරීන් විසින් හඳුන්වා දෙනු ලැබූ නව රෙගුලාසි මාලාවක් හේතුවෙන්, සිසුන් පෞද්ගලික පාසල් වෙත පැමිණීමේ සහ පිටවී යාමේ ක්රමවේදයන්හි විශාල වෙනස්කම් රැසක් සිදුකර ඇති බවට පසුගිය සතියේ දෙමාපියන් දැනුවත් කර තිබෙනවා.
ඒ දරුවන්ගේ ආරක්ෂාව සහ ප්රවාහන සුරක්ෂිතභාවය ශක්තිමත් කිරීමේ අරමුණින්.
අබුඩාබි හි පෞද්ගලික අධ්යාපනය අධීක්ෂණය කරන අධ්යාපන හා දැනුම දෙපාර්තමේන්තුව (ADEK) විසින් පාසල්වලට නියෝග කර ඇත්තේ, පාසල් දිනය ආරම්භ වීමට මිනිත්තු 45කට පෙර සිට සහ එය අවසන් වී මිනිත්තු 90ක් දක්වා කාලය තුළ සිසුන් අධීක්ෂණය කිරීම සඳහා සුදුසු නිලධාරීන් යෙදවිය යුතු බවයි.
මෙම පියවර, අධ්යාපන හා දැනුම දෙපාර්තමේන්තුවේ ශිෂ්ය ප්රවාහන සහ ආරක්ෂණ ප්රතිපත්ති සමඟ සමපාත වීම සඳහා ගනු ලැබූ ක්රියාමාර්ග මාලාවක කොටසක් බව සඳහන්.
දෙමාපියන් වෙත විද්යුත් තැපෑලෙන් යවන ලද පණිවිඩ මගින් පාසල් පෙන්වා දී ඇත්තේ, වයස අවුරුදු 15ට අඩු දරුවන්ට වැඩිහිටියෙකුගේ සහායකින් තොරව පාසලට පැමිණීමට හෝ පිටව යාමට තවදුරටත් අවසර නොමැති බවයි.
පයින් ගමන් කිරීම, කුලී රථ, පෞද්ගලික මෝටර් රථ හෝ වෙනත් ප්රවාහන සේවා භාවිත කිරීම මෙන්ම පාසල් නොවන බස් රථවල ගමන් කිරීම සඳහා ද මෙම සීමාව බල පැවැත්වෙන බව අවධාරණය කර තිබෙනවා.
මෙම නීති කිසිදු ව්යතිරේකයකින් තොරව ක්රියාත්මක වීම විශේෂ අවධානයට ලක්වී ඇති අතර, මීට පෙර තනිවම පාසලට පයින් පැමිණි, පාසල ආසන්නයේම පදිංචි දරුවන් සඳහා පවා කිසිදු සහනයක් ලබා දීම අධ්යාපන හා දැනුම දෙපාර්තමේන්තුව විසින් ප්රතික්ෂේප කර ඇති අතර “දරුවන්ගේ ආරක්ෂාව අවසාන ප්රමුඛතාවය” වන බැවින් මෙම නීතිය සැමට එකසේ ක්රියාත්මක කිරීම අත්යවශ්ය බවයි බලධාරීන් ප්රකාශ කර ඇත්තේ.
කෙසේ වෙතත්, සාමාන්යයෙන් 9 වන ශ්රේණියේ සිට 12 වන ශ්රේණිය දක්වා ඉගෙනුම ලබන වයසින් වැඩි සිසුන්ට, දෙමාපියන්ගේ ලිඛිත අනුමැතියක් ලබා දීමෙන් අනතුරුව ස්වාධීනව ගමන් කිරීමට දිගටම අවසර දෙනු ලබනවා.
එහෙත්, එවැනි අවස්ථාවකදී පවා, එම සිසුන් පාසල් නොවන ප්රවාහන මාධ්යයක් භාවිත කර පාසල් භූමියෙන් පිටව ගිය පසු ඔවුන්ගේ වගකීම පාසල විසින් භාර නොගන්නා බව අධ්යාපන හා දැනුම දෙපාර්තමේන්තුව අවධාරණය කරනවා.
යාවත්කාලීන කරන ලද ප්රතිපත්තියට අනුව, සිසුන් නිදහස් කරනු ලබන්නේ බලයලත් වැඩිහිටියන්ට පමණක් බව සහතික කිරීම සඳහා විධිමත් භාරදීමේ ක්රියාවලියක් ස්ථාපිත කිරීමට පාසල්වලට සිදුවේ. අනුමත ලැයිස්තුවේ නොමැති අයෙකු දරුවා රැගෙන යාමට පැමිණෙන්නේ නම්, හදිසි වෙනස්වීමකදී පවා, දෙමාපියන් ඒ පිළිබඳව කල්තියා ලිඛිතව දැනුම් දිය යුතුයි.
පාසල් විසින් එවැනි සන්නිවේදන වාර්තාගත කිරීම, ගේට්ටුවේදී හැඳුනුම්පත් සත්යාපනය කිරීම සහ එම නම් ආරක්ෂක කාර්ය මණ්ඩලය හා අධීක්ෂකවරුන් අතර බෙදාහැරීම අනිවාර්ය කර තිබෙනවා.
ආරක්ෂක විධිවිධාන තවදුරටත් තර කරමින්, සියලුම පාසල් පිවිසුම් ස්ථානවල පැය 24 පුරාම ආරක්ෂක නිලධාරීන් යෙදවීමට ද අධ්යාපන හා දැනුම දෙපාර්තමේන්තුව නියෝග කර තිබෙනවා.
එම නිලධාරීන් විසින් ආගන්තුකයන්ගේ තොරතුරු සටහන් කර ගත යුතු අතර, සහන සේවකයෙකු විසින් රාජකාරි භාරගන්නා තෙක් සිය ස්ථානයේ රැඳී සිටිය යුතුයි.
අනවසර පුද්ගලයින්ගෙන් සිදුවිය හැකි අවදානම් අවම කිරීම සඳහා “ආරක්ෂක අනවසර ඇතුළුවීම්” කළමනාකරණය කිරීමේ ක්රමවේද පවත්වාගෙන යාමටද පාසල්වලට සිදුවනු ඇති.
මෙම නව නීති යටතේ, පාසලේ වගකීම් සීමාවන් පැහැදිලි කර ඇති අතර, අධීක්ෂණය අදාළ වන්නේ පන්ති ආරම්භයට පෙර මිනිත්තු 45 සහ පසුව මිනිත්තු 90 ක කාල රාමුවට පමණක් බවත්, එම කාලයෙන් පිටත පාසලේ දැනුවත්භාවයකින් තොරව ගෙනැවිත් දමන සිසුන් සම්බන්ධයෙන් පාසල වගකියනු නොලබන බවත් දක්වා තිබෙනවා.
මීට අමතරව, ස්කූටර් හෝ බයිසිකල් වැනි පාසල් නොවන ප්රවාහන මාධ්ය භාවිතා කරන වයසින් වැඩි සිසුන්ගේ දෙමාපියන්, එමගින් සිදුවිය හැකි අනතුරු හෝ සිදුවීම් සඳහා පාසල කිසිදු වගකීමක් නොදරන බවට එකඟවෙමින් අත්සන් කළ යුතු වනවා.
මෙම නීතිරීතිවලට අනුකූල නොවන පාසල්වලට එක්සත් අරාබි එමීර් රාජ්යයේ අපරාධ සහ සිවිල් නීතිවල දක්වා ඇති දඬුවම් ඇතුළුව, නීතිමය හෝ පරිපාලනමය දඬුවම්වලට මුහුණ දීමට සිදුවනු ඇති බවට අධ්යාපන හා දැනුම දෙපාර්තමේන්තුව අනතුරු අඟවා තිබෙනවා.
එමෙන්ම, යම් පාසලක් සිය වගකීම් පැහැර හරින බවට පෙනී ගියහොත් සෘජුවම මැදිහත් වීමේ අයිතිය ද ඔවුන් සතු බවයි ප්රකාශ කර ඇත්තේ.
