ප්‍රංශ ජනාධිපති එමානුවෙල් මැක්‍රොන්ගේ බිරිඳ වන බ්‍රිජිට් මැක්‍රොන්, තමන් කාන්තාවක් බවට විද්‍යාත්මක සාක්ෂි ඉදිරිපත් කිරීමට සූදානම් වන බව විදෙස් මාධ්‍ය වාර්තා කරනවා.

දක්ෂිණාංශික ක්‍රියාකාරිනියක වන කැන්ඩේස් ඕවන්ස්ට එරෙහිව ඇය විසින් අධිකරණයක අපහාස නඩුවක් ද ගොනු කර තිබෙනවා.

ඕවන්ස් දිගින් දිගටම ප්‍රකාශ කර ඇත්තේ බ්‍රිජිට් මැක්‍රොන් යනු කාන්තාවක් නොව පිරිමියෙකු බවයි.

මෙම අසත්‍ය චෝදනාව බිඳ හෙළීම සඳහා, ඡායාරූපමය සහ විද්‍යාත්මක සාක්ෂි අධිකරණයට ඉදිරිපත් කිරීමට මැක්‍රොන් මහත්මියගේ නීතිඥයින් කටයුතු කරනු ඇති.

ඇයගේ ගර්භණී සමයේ ඡායාරූප පවා සාක්ෂි ලෙස ඉදිරිපත් කිරීමට ඉඩ ඇති බවට වාර්තා වනවා.

සමාජ මාධ්‍ය තුළ මිලියන ගණනක අනුගාමිකයින් සිටින කැන්ඩේස් ඕවන්ස්, මෙම මතය දිගින් දිගටම ප්‍රචාරය කර තිබෙනවා.

“Becoming Brigitte” නමින් යූටියුබ් වීඩියෝ මාලාවක් පවා පවත්වාගෙන යමින් ඇය බ්‍රිජිට් මැක්‍රොන්ගේ ලිංගික අනන්‍යතාවය ප්‍රශ්න කර තිබේබෙනවා.

මෙය මනුෂ්‍ය ඉතිහාසයේ විශාලතම දේශපාලන වංචාවක් බවයි ඇය ප්‍රකාශ කර ඇත්තේ.

මෙම කටකතාව මුලින්ම ප්‍රබල ලෙස පැතිර ගියේ 2021 වසරේදීයි.

ඒ ප්‍රංශ යූටියුබ් ක්‍රියාකාරිනියක වන අමන්ඩින් රෝයි විසින් මාධ්‍යවේදිනියක වන නටාෂා රේ සමඟ පැය හතරක සම්මුඛ සාකච්ඡාවක් පැවැත්වීමත් සමඟයි.

එහිදී නටාෂා රේ ප්‍රකාශ කළේ, තමන් වසර තුනක පර්යේෂණයකින් අනතුරුව සොයාගත් පරිදි බ්‍රිජිට් මැක්‍රොන් යනු උපතින් පිරිමියෙකු බවත්, ඇයගේ සැබෑ නම ජීන්-මිෂෙල් ට්‍රොග්නෙක්ස් බවයි.

මෙම චෝදනාවලට එරෙහිව මැක්‍රොන් යුවළ පළමුව ප්‍රංශයේ නීතිමය ක්‍රියාමාර්ග ගත්තේ නටාෂා රේ සහ අමන්ඩින් රෝයිට විරුද්ධවයි.

2023 සැප්තැම්බරයේදී පැරිස් අධිකරණයක් ඔවුන් වරදකරුවන් කරමින් බ්‍රිජිට් මැක්‍රොන් සහ ඇගේ සහෝදරයාට වන්දි මුදලක් ගෙවන ලෙස නියෝග කළා.

කෙසේ වෙතත්, අභියාචනාධිකරණයක් මගින් එම තීන්දුව පසුව නිෂ්ප්‍රභ කළ අතර ඊට එරෙහිව බ්‍රිජිට් මැක්‍රොන් මේ වන විට ප්‍රංශ ශ්‍රේෂ්ඨාධිකරණයට අභියාචනයක් ඉදිරිපත් කර තිබෙනවා.

ජනාධිපති එමානුවෙල් මැක්‍රොන් සහ ඔහුගේ බිරිඳ අතර වයස් පරතරය වසර 24ක් වීමද සමාජ මාධ්‍ය තුළ නිරන්තර කතාබහට ලක්වන මාතෘකාවක්.

1992 දී එමානුවෙල් මැක්‍රොන් 15 හැවිරිදි පාසල් සිසුවෙකුව සිටියදී, 39 හැවිරිදි වියේ පසුවූ බ්‍රිජිට් ඔහුගේ නාට්‍ය හා සාහිත්‍ය ගුරුවරිය ලෙස කටයුතු කළ අතර, ඔවුන්ගේ හමුවීම එලෙස සිදුවිවුණා.

ප්‍රසිද්ධ කාන්තාවන්ගේ ලිංගිකත්වය පිළිබඳව මෙවැනි කුමන්ත්‍රණ න්‍යායන් පැතිරීම බ්‍රිජිට් මැක්‍රොන්ට පමණක් සීමා වූවක් නොවේ.

මීට පෙර එක්සත් ජනපදයේ හිටපු ජනාධිපති ආර්යාව වන මිෂෙල් ඔබාමා, නවසීලන්තයේ හිටපු අගමැතිනි ජසින්ඩා ආර්ඩර්න් සහ මෙලනියා ට්‍රම්ප් වැනි ඉහළ පෙළේ කාන්තාවන් ද මෙවැනිම අසත්‍ය චෝදනාවලට ලක්වී තිබෙනවා.