ජාතික ගගනගාමී හා අභ්‍යවකාශ පරිපාලනය (NASA) සිය සේවක සංඛ්‍යාවෙන් අවම වශයෙන් සියයට 20ක් කපා හැරීමට අපේක්ෂා කරන බව විදෙස් මාධ්‍ය වාර්තා කරනවා.

ඒ අනුව, මෙය ට්‍රම්ප් පරිපාලනය යටතේ එක්සත් ජනපද අභ්‍යවකාශ ඒජන්සියට බලපාන දෙවන ප්‍රධාන කාර්ය මණ්ඩල කප්පාදුවයි.

මෙම කප්පාදුවත් සමඟ NASA හි සේවක සංඛ්‍යාව දළ වශයෙන් 14,000ක් පමණ වනු ඇති බවයි විදෙස් මාධ්‍ය පෙන්වා දෙන්නේ.

රොයිටර්ස් පුවත් සේවයට අනුව, NASA ප්‍රකාශකයෙකු පවසා ඇත්තේ 3,870 ක් පමණ පුද්ගලයන් සේවයෙන් ඉවත් වීමට අපේක්ෂා කරන නමුත්, එම සංඛ්‍යාව ඉදිරි දින කිහිපය තුළ වෙනස් විය හැකි බවයි.

මෙම මස මුලදී Politico විසින් ලබාගත් ලේඛනවල සඳහන් වූයේ, ට්‍රම්ප් පරිපාලනය අවම වශයෙන් ජ්‍යෙෂ්ඨ මට්ටමේ NASA සේවකයින් 2,145 දෙනෙකු කපා හැරීමට සැලසුම් කර ඇති බවයි.

ඔවුන්ගෙන් බහුතරයක් විශේෂිත කුසලතා සහ කළමනාකරණ හැකියාවන්ගෙන් සමන්විත අය බව වාර්තා වූ බවත්, බලපෑමට ලක් වූ කාර්ය මණ්ඩලයට ඉක්මන් විශ්‍රාම ගැනීම්, මිලදී ගැනීම් සහ කල් දැමූ ඉල්ලා අස්වීම් ලබා දී ඇති බවද එම වාර්තාවේ සඳහන්.