ඔස්ට්‍රෙලියානු තුන් ඉරියව් ක්‍රීඩක ග්ලේන් මැක්ස්වෙල් එක්දින පිටියෙන් සමුගන්නා බව නිල වශයෙන් නිවේදනය කර තිබෙනවා.

නමුත් මැක්ස්වෙල් සඳහන් කර ඇත්තේ තමන් පන්දුවාර 20 ක්‍රීඩා ආකෘතියෙහි රැඳී සිටින බවයි.

ඒ අනුව ලබන වසරේ පැවැත්වෙන පන්දුවාර 20 ක්‍රිකට් ලෝක කුසලානය සඳහා මැක්ස්වෙල් රැඳී සිටිනු ඇති බවයි ක්‍රිකට් ආරංචි මාර්ග තහවුරු කරන්නේ.

36 හැවිරිදි මැක්ස්වෙල්, එක්දින තරග 149කට ක්‍රීඩා කර තිබෙනවා.

ඔහු එක්දින දිවියේ ලබාගෙන ඇති වැඩිම ලකුණු සංඛ්‍යාව වන්නේ නොදැවුණු ලකුණු 201ක්.

එක්දින ලකුණු 3,990ක් ලබා ඇති මැක්ස්වෙල් දවාගෙන ඇති කඩුලු සංඛ්‍යාව 77ක්.

ඔහුගේ හොඳම පන්දු යැවීම ලෙස සටහන් වන්නේ ලකුණු 40කට කඩුලු 04ක් බිඳ දැමීමයි.

2012 වසරේ දී සාජා නුවර දී ඇෆ්ගනිස්තානයට එරෙහිව ජාත්‍යන්තර එක්දින වරම් හිමිකරගෙන ඇති මැක්ස්වෙල් යනු තුන් ඉරියව්වෙන් ම ලෝක ක්‍රිකට් ආකෘතිය තුළ දස්කම් දැක්වූ අයෙක්.

සිය සමුගැනීමේ නිවේදනය නිකුත් කරමින් මැක්සි සඳහන් කර ඇත්තේ, තමන් ක්‍රීඩාව වෙනුවෙන් උපරිමයෙන් කටයුතු කළ බවයි.

ජාත්‍යන්තර එක්දින ක්‍රිකට් පිටියේ ප්‍රවේගකාරී ම සහ හඹා ගොස් තරගයක ජය, පරාජය වෙනස් කළ හැකි ක්‍රීඩකයෙකු ලෙසයි ග්ලේන් මැක්ස්වෙල් සැලකෙන්නේ.