2025 මාස්ටර්ස් ලීග් විස්සයි විස්ස තරගාවලියේ අවසන් මහා තරගයට සුදුසුකම් ලබාගැනීමට ශ්රී ලංකා මාස්ටර්ස් කණ්ඩායමට තිබූ බලාපොරොත්තුව ඊයේ (14) බොඳව ගියා.
ඒ, මෙවර තරගාවලියේ දී ශ්රී ලංකාව මුහුණ දුන් දෙවන අවසන් පූර්ව තරගයේ දී බටහිර ඉන්දීය කොදෙව් මාස්ටර්ස් කණ්ඩායම ඉදිරියේ පරාජයවීම හේතුවෙන්.
රායිපුර් හි පැවති මෙම තරගය ශ්රී ලංකාව පරාජයට පත් වුණේ ලකුණු 06කින්.
ශ්රී ලංකාව සමඟ පැවති මෙම තරගයේ දී පළමුව පන්දුවට පගර දුන් කොදෙව් කණ්ඩායම නියමිත පන්දුවාර විස්ස තුළ කඩුලු 05ක් දැවී ලකුණු 179ක් රැස් කළා.
අනතුරුව ලකුණු 180ක ඉලක්කය හඹා යාමට පිටියට පිවිසි ශ්රී ලංකා කණ්ඩායමට නියමිත පන්දුවාර 20 තුළ කඩුලු 09ක් දැවී රැස්කරගත හැකි වූයේ ලකුණු 173ක් පමණයි.
ශ්රී ලංකා ඉනිමේ අවසන් පන්දුව තෙක් සටන අත්නොහැරි අසේල ගුණරත්න ශ්රී ලංකා ඉනිම වෙනුවෙන් ලකුණු 66ක් රැස් කළා.
කෙසේ වෙතත් ඔහුගේ උත්සාහය අපතේ යවමින් කොදෙව් මාස්ටර්ස් කණ්ඩායම මෙම තරගය ජයගෙන අවසන් මහා තරගය සඳහා සුදුසුකම් ලබා ගත්තා.
ඒ අනුව ඕස්ට්රේලියාව පරාජය කර අවසන් මහා තරගයට සුදුසුකම් ලබා සිටින ඉන්දීය මාස්ටර්ස් කණ්ඩායම සමඟ කොදෙව් මාස්ටර්ස් කණ්ඩායම හෙට (16) අවසන් මහා තරගයේ තරග වැදීමට නියමිතයි.
