වයස අවුරුදු 3, 4 සහ 5 දරුවන් Netflix හි ජනප්‍රිය ‘The Squid Game’ කතා මාලාවේ එන ප්‍රචණ්ඩ දර්ශන,පන්ති කාමර තුළ නැවත නිරූපණය කරමින් සිටින බවට නව ප්‍රවණතාවයක් දක්නට ලැබෙන බව මෙක්සිකෝවේ පාසල් ගුරුවරියක් සමාජ මාධ්‍ය ඔස්සේ සිය කනස්සල්ල පළ කර තිබෙනවා.
TikTok හි පළ කළ වීඩියෝවක් මගින් ගුරුවරිය වාර්තා කර ඇති පරිදි, කුඩා දරුවන් “කොළ එළිය, රතු එළිය” (Green Light, Red Light) නම් ක්‍රීඩාව කරමින් සිටි අතර, එය කතා මාලාවේ පළමු කොටසේ දැක්වෙන ප්‍රචණ්ඩත්වයෙන් පිරුණු අංගයක් වනවා.
කොළ එළියට ඇවිද යායුතු අතර රතු එලියට නැවතිය යුතුයි. නැවතීම නිසි වේලාවකට නොකර සෙලවෙන කෙනා වෙඩි තබා මරනු ලබනවා.
මෙම සිදුවීම ළමුන් කෙරෙහි දෘශ්‍ය-ශ්‍රව්‍ය අන්තර්ගතයන්ගේ බලපෑම සහ මෙවැනි නිර්මාණ නැරඹීමේදී දෙමාපියන්ගේ වගකීම පිළිබඳ සමාජ සංවාදයක් ඇති කර තිබෙනවා.
ගුරුවරියගේ පළකිරීමට අනුව, මෙම ක්‍රීඩාව හඳුන්වා දී ඇත්තේ එක් සිසුවෙකු විසින්.
ඔහු කතා මාලාව නරඹා තිබූ අතර එහි නීති රීති සිය සහයත මිතුරන්ට උගන්වා තිබෙනවා.
මෙම තත්ත්වය ගැන කනස්සල්ලට පත් ගුරුවරිය ප්‍රශ්න කර සිටියේ මෙතරම් කුඩා දරුවන්ට ඔවුන්ගේ වයසට නුසුදුසු වැඩසටහනකට ප්‍රවේශය ලැබුණේ කෙසේද යන්නයි. “අපි කතා කරන්නේ අවුරුදු 3, 4 සහ 5 දරුවන් ගැනයි. මොන වෙලාවේද ඔවුන් මේක බැලුවේ? කොහොමද ඔවුන්ට මේක බලන්න ඉඩ දුන්නේ?” යනුවෙන් ඇය වීඩියෝවේදී විමසා සිටියා.
2021 දී එළිදැක්වූ ‘ස්ක්විඩ් ගේම්’ ගෝලීය සංස්කෘතික බලපෑමක් ඇති කරමින් මිලියන ගණනක් නරඹන්නන් ආකර්ෂණය කර ගත් ටෙලි කතා මාලාවක්.
සමාජ විවේචනය, අභිරහස් සහ නාට්‍යමය අංග එක්කර ගනිමින් නිර්මාණය කර ඇති මෙම දකුණු කොරියානු කතා මාලාවේ, ළමා ක්‍රීඩා සහභාගිවන්නන්ට මාරාන්තික ප්‍රතිවිපාක ගෙන දෙනවා.
වයස අවුරුදු 16ට වැඩි පුද්ගලයින් සඳහා වර්ගීකරණය කර ඇති නමුත්, සමාජ මාධ්‍ය, මීම්ස් සහ ජංගම දුරකථන යෙදවුම් හරහා එය කුඩා දරුවන් අතරටද ව්‍යාප්ත වී තිබෙනවා.
ගුරුවරිය පෙන්වා දුන්නේ බොහෝ දරුවන් මෙහි ඇති ප්‍රචණ්ඩ පසුබිම නොදන්නා බවයි. “මගේ දරුවන්ගෙන් සමහරු තමන් කරන්නේ මොකක්ද කියලවත් දන්නේ නැති බව මට හිතෙනවා,” යැයි ඇය සිය වීඩියෝවේ සඳහන් කළා.
ගුරුවරිය අවධාරණය කළේ මෙවැනි අන්තර්ගත දරුවන්ගේ චිත්තවේගීය හා සමාජීය වර්ධනයට අහිතකර බලපෑම් ඇති කළ හැකි අතර, පන්ති කාමරය තුළ සහ ඉන් පිටත ඔවුන්ගේ හැසිරීමට බලපෑම් කළ හැකි බවයි.
