සටන් විරාම ගිවිසුමක් පිළිබඳ වැඩිපුර අවධානය යොමු වන අතරතුර ඊශ්‍රායලය ගාසා තීරයට දරුණු ප්‍රහාර එල්ල කර තිබෙනවා.
මධ්‍යම ගාසා තීරයේ ඩීර් එල් බාලා ප්‍රදේශයේ නිවසකට ඊශ්‍රායලය ඊයේ රාත්‍රියේ එල්ල කළ ප්‍රහාරයකින් පුද්ගලයන් 13 දෙනෙකු ජීවිතක්ෂයට පත්ව තිබෙනවා.
ගතවූ පැය 24 තුළ ගාසා තීරයට ඊශ්‍රායලය එල්ල කළ ප්‍රහාරවලින් පුද්ගලයන් 63 දෙනෙකු මිය ගොස් 281 දෙනෙකු තුවාල ලබා ඇති බවයි පලස්තීන සෞඛ්‍ය අමාත්‍යාංශය පැවසුවේ.
එමෙන්ම බටහිර ඉවුරේ ජෙනින් සරණාගත කඳවුරට ඊශ්‍රායලය එල්ල කළ ගුවන් ප්‍රහාරයකින් හය දෙනෙකු මිය ගියා.
ගාසා තීරයේ සටන් විරාමයක් ඇති කර ගැනීම සඳහා වූ කටාර් හි පැවති සාකච්ඡා මේ වනවිට අවසන් අදියරේ පවතිනවා.
පසුගිය 2023 වසරේ ඔක්තෝබර් 7වන දා සිට පලස්තීනුවන් 46,645 ක් ඝාතනයට ලක්ව ඇති අතර 110,012 ක් තුවාල ලබා සිටිනවා.
