ඉන්දියාවේ බැංගලෝර් සහ ගුජරාටයට පසුව, දැන් HMPV වෛරසය මහාරාෂ්ට්‍රයට ද ඇතුළු වී තිබෙනවා.

ඒ අනුව එහි සිටින දරුවන් දෙදෙනෙකුගේ වාර්තා ධනාත්මකව ලැබී තිබෙන බවයි එරට මාධ්‍ය වාර්තා කළේ.

කැස්ස සහ උණ හේතුවෙන් ප්‍රතිකාර සඳහා නගරයේ පෞද්ගලික රෝහලකට රැගෙන ආ බවද පැවසෙන අතර මෙම දරුවන්ගේ වයස අවුරුදු 7 ක් සහ අවුරුදු 14 ක් වන බවද සඳහන් වනවා.

මෙම සිද්ධීන් අනාවරණය වීමෙන් පසුව, එරට මුළු HMPV වෛරස් රෝගීන් සංඛ්‍යාව මේ වන විට 7 දක්වා ඉහළ ගොස් තිබෙනවා.

මහාරාෂ්ට්‍ර ප්‍රදේශයෙන් මෙම සිද්ධිය අනාවරණය වීමත් සමඟ සෞඛ්‍ය දෙපාර්තමේන්තු කණ්ඩායම රටටම මේ ගැන අනතුරු අඟවා තිබෙනවා.

කෙසේවෙතත් කලබල නොවන ලෙස එරට රජය ජනතාවගෙන් ඉල්ලා සිටිනවා.

මීට අමතරව, මෙම වෛරසය සම්බන්ධයෙන් මාර්ගෝපදේශ නිකුත් කළ ඉන්දීය සෞඛ්‍ය අමාත්‍ය නඩ්ඩා මෙසේ සඳහන් කරනවා…

“තත්වය සමාලෝචනය කිරීම සඳහා සෞඛ්‍ය සේවා අධ්‍යක්ෂ ජනරාල්වරයාගේ ප්‍රධානත්වයෙන් ඒකාබද්ධ නිරීක්ෂණ කණ්ඩායමක් ජනවාරි 4 වන දින රැස්වුණා. රටේ සෞඛ්‍ය පද්ධති සහ නිරීක්ෂණ ජාලයන් සීරුවෙන් සිටිනවා, නැගී එන ඕනෑම මතුවීමක් සම්බන්ධයෙන් රට අවධානයෙන් සිටින බව සහතිකයි,” සෞඛ්‍ය නිවේදනයක් නිකුත් කරමින් අමාත්‍යවරයා පැවසුවේ “සෞඛ්‍ය අභියෝගවලට වහා ප්‍රතිචාර දැක්වීමට අපි සූදානම්. කලබල විය යුතු නැත, අපි තත්ත්වය සමීපව නිරීක්ෂණය කරමින් සිටිමු.”