එක්සත් ජනපදයට බලපා ඇති හිම කුණාටුව හේතුවෙන් මිලියන 63ක ජනතාව පීඩාවට පත්ව ඇති බව වාර්තා වනවා.
මෙම තත්ත්වයත් සමඟ ප්‍රාන්ත දෙකක හදිසි අවස්ථාවක් ප්‍රකාශයට පත්කර ඇති බවයි විදෙස් මාධ්‍ය වාර්තා කරන්නේ.
හිම කුණාටුවත් සමඟ ඇතිවන හිම පතනය දශකයකට පමණ පසුව සිදුවන දරුණුතම හිම පතනය බවයි එක්සත් ජනපද කාලගුණ බලධාරීන් සඳහන් කරන්නේ.
කැන්සාස්, බටහිර නෙබ්‍රස්කා සහ ඉන්දියානා ප්‍රදේශයන්හි ප්‍රධාන මාර්ග සියල්ලම පාහේ හිම සහ අයිස්වලින් වැසී ගොස් ඇති අතර, හිම කුණාටුව ඔහියෝ නිම්නය වෙත ගමන් කරනු ඇතැයි පුරෝකථනය කරනවා.
මේ අතර එරට බලධාරීන් ජනතාවට දැනුම් දෙන්නේ මාර්ගවල වාහන ධාවනයෙන් හැකිතාක් ඉවත් වී සිටින ලෙසයි.
පවතින අධික හිම පතනය හේතුවෙන් ඉරිදා වන විට වර්ජිනියා, ඉන්දියානා, කැන්සාස් සහ කෙන්ටකි යන ප්‍රදේශවල සිය ගනනක් රිය අනතුරු වාර්තා වී ඇති බවයි වාර්තා වුණේ.
මේ අතර මෙම තත්ත්වයත් සමඟ ගුවන් හා දුම්රිය ගමනාගමනය ද අඩාල වී ඇති බව වාර්තා වනවා.
හිම කුණාටු හේතුවෙන් දුම්රිය මාර්ගවලට ද විනාශයක් ඇති වූ අතර එය දුම්රිය අවලංගු කිරීම් රැසකට තුඩු දී තිබෙනවා.
