ශ්‍රී ලංකාවේ පුරෝගාමී ව්‍යාපාරික සඟරාවක් වන LMD විසින් 2024 සඳහා ‘වසරේ ශ්‍රී ලාංකිකයා’ ලෙස ශ්‍රී ලංකා මහ බැංකුවේ අධිපති ආචාර්ය නන්දලාල් වීරසිංහ නම්කර තිබෙනවා.
LMD පවසන්නේ, දැඩි ලෙස ක්ෂය වී ඇති ආර්ථිකයක් නැවත පණ ගැන්වීමේ දුෂ්කර කාර්යය ආචාර්ය වීරසිංහගේ නායකත්වය යටතේ ආරම්භ වූ බවයි.
ඉදිරියේ ඇති අභියෝග පිළිබඳ ඔහු යථාර්ථවාදී දැක්මකින් යුතුව අර්බුදය ක්ෂණිකව විසඳිය නොහැකි බව පිළිගත් බවද එහි සඳහන්.
මහ බැංකුවේ අධිපති ආචාර්ය වීරසිංහ පවතින තත්ත්වය සැබෑ ලෙස පිළිගනිමින් එම වසරේ දෙසැම්බර් මාසය දක්වා දුෂ්කරතා පවතිනු ඇතැයි අවංකව අනාවැකි පළකළ බව එම සඟරාව පවසනවා.
“ඔහු 2022 අප්‍රේල් මාසයේදී මහ බැංකු අධිපතිවරයාගේ භූමිකාව භාර ගන්නා විට, උද්ධමනය 29.8%ක් වූ අතර ක්‍රමයෙන් අඩුවීමට පෙර එම වසරේ නොවැම්බර් මාසයේදී උද්ධමනය 61% දක්වා ඉහළ ගියේය. දැඩි ප්‍රතිපත්ති ක්‍රියාමාර්ගවලට ස්තූතිවන්ත වන්නට, උද්ධමනය 2023 ජූලි වන විට තනි ඉලක්කමක් දක්වා පහත වැටුණු අතර එය වසරක කාලය තුළ සැළකිව යුතු දියුණුවක් සනිටුහන් කළේය” යනුවෙන් සඟරාව තවදුරටත් සඳහන් කර තිබෙනවා.
LMD විසින් නම්කරන ලද ‘වසරේ ශ්‍රී ලාංකිකයා’ සමාජයට 30 වැනියා ලෙසින් ශ්‍රී ලංකා මහ බැංකුවේ අධිපති ආචාර්ය නන්දලාල් වීරසිංහ මේ අනුව එකතු වනවා.
1995 දී දිවංගත ලක්ෂ්මන් කදිරගාමර් ද මෙම විශිෂ්ට සම්මාන අතරට ශ්‍රේණිගත වී සිටිනවා.
