ශ්‍රී ලංකා මුහුදේ උතුරු ප්‍රදේශයේ ඩෙල්ෆ්ට් දූපත ආසන්නයේදී ඉන්දීය ධීවර යාත්‍රාවක් පෙරලීමෙන් එක් අයෙකු ජීවිතක්ෂයට පත්ව තවත් පුද්ගලයෙකු අතුරුදන්ව ඇති බව වාර්තා වනවා.
නාවික හමුදා මාධ්‍ය ප්‍රකාශක කපිතාන් ගයාන් වික්‍රමසූරිය මහතා පැවසුවේ, අද අලුයම ශ්‍රී ලංකා නාවික හමුදාවේ මුර යාත්‍රාවක් ශ්‍රී ලංකා මුහුදු සීමාවේ ඉන්දීය ධීවරයින් ක්‍රියාත්මක වන අයුරු දුටු බවයි.
නාවික හමුදාව ධීවරයින් අත්අඩංගුවට ගැනීමට උත්සාහ කිරීමේදී ඔවුන් ගමන් කළ ඉන්දීය බෝට්ටුව පෙරළී ගොස් තිබෙනවා.
නාවික හමුදාව ප්‍රකාශ කළේ සිද්ධිය වන අවස්ථාවේ ඉන්දීය යාත්‍රාවේ ධීවරයින් සිව් දෙනෙකු සිට ඇති බවයි.
නාවික හමුදාව විසින් එක් ධීවරයෙකු බේරාගෙන පුංකුඩතිව් රෝහලට රැගෙන ගිය නමුත් ඇතුළත් කිරීමෙන් ටික වේලාවකට පසු මිය ගියා.
නාවික හමුදාව ප්‍රදේශයේ සෝදිසි මෙහෙයුම් සිදු කරමින් අතුරුදන් වූ ධීවරයා සොයා ගැනීමේ කටයුතු මේ වනවිට ක්‍රියාත්මකයි.
මේ අතර, පෙරළුණු යාත්‍රාවේ සිටි අනෙක් ධීවරයින් දෙදෙනා නාවික හමුදාව විසින් අත්අඩංගුවට ගෙන තිබෙනවා.
