ශ්‍රී ලංකාවට බලපාන ප්‍රධාන ගැටළු වන මියන්මාරයට මිනිස් ජාවාරම් කිරීම සහ රුසියානු යුක්රේන ගැටුමට යුද ප්‍රවීණයන් යෙදවීම වැනි ප්‍රධාන ගැටලු විසඳීම සඳහා ආරක්ෂක අමාත්‍යාංශය පියවර කිහිපයක් ගෙන තිබෙනවා.
ඒ අනුව මාධ්‍ය අමතමින් ආරක්ෂක අමාත්‍යාංශයේ ලේකම්වි ශ්‍රාමික ජෙනරාල් කමල් ගුණරත්න පැවසුවේ තම ප්‍රධානත්වයෙන් ක්‍රියාත්මක වන මිනිස් ජාවාරමට එරෙහි ජාතික කාර්ය සාධක බලකාය ශ්‍රී ලංකාවේ මිනිස් ජාවාරම මැඩලීමට අවශ්‍ය සියලු පියවර ගෙන ඇති බවයි.
එක්සත් ජනපද රාජ්‍ය දෙපාර්තමේන්තුවේ දෙවන ස්ථරයේ තත්ත්වය අඛණ්ඩව වසර තුනක් පවත්වා ගැනීමට ද එමඟින් හැකියාව ලැබී ඇති බව ඔහු වැඩිදුරටත් පැවසුවා.
“මියන්මාරයේ ශ්‍රී ලාංකිකයින් බලහත්කාරයෙන් රඳවා තබාගෙන අන්තර්ජාල වංචාවන් සඳහා යොදා ගැනීමේ ප්‍රශ්නය විසඳීමට පියවර ගෙන ඇත. අපගේ අවධානය යොමු වී ඇත්තේ මෙම පුද්ගලයින් බේරා ගැනීමයි. එහි ප්‍රතිඵලයක් ලෙස අපි පුද්ගලයන් 40 දෙනෙකු සාර්ථකව බේරාගෙන ශ්‍රී ලංකාවට රැගෙන ආවා. කෙසේ වෙතත්, තවත් පිරිසක් ඩුබායි හි තැරැව්කරුවන් හරහා මෙම ප්‍රදේශයට ගමන් කර ඇති අතර, තවත් පුද්ගලයින් 54 දෙනෙකු බේරා ගැනීමට නියමිතයි.
මේ සම්බන්ධයෙන් මම මියන්මාරයේ අග්‍රාමාත්‍යවරයා සහ ජාතික ආරක්ෂක ලේකම්වරයා සමඟ සාකච්ඡා කර තිබෙනවා. ඔවුන් නිදහස් කර ගැනීම සඳහා නිල වශයෙන් සහ හිටපු හමුදා නිලධාරියෙකු ලෙස රාජ්‍යතාන්ත්‍රික ඉල්ලීම් සහ අභියාචනා ඉදිරිපත් කළා. මියන්මාරයේ ආරක්ෂක ලේකම්වරයා මට දන්වා ඇත්තේ මෙම ගැටලුව විසඳීමට මැදිහත් වී අවශ්‍ය සියලු පියවර ගන්නා ලෙස අග්‍රාමාත්‍යවරයා උපදෙස් දී ඇති බවයි.”
